Aelwyd yr Ynys

Eisteddfod yr Urdd 08: Cyflwyniad Bae Caerdydd 2009

2008-05-28T12:37:00.004+01:00

Ddydd Mawrth yr Eisteddfod cymrodd dros hanner cant o aelodau'r Aelwyd ran yng Nghyflwyniad Aelwyd yr Ynys i gyflwyno Eisteddfod yr Urdd flwyddyn nesa' i Gaerdydd, er mai gogs ydan ni! Mae'r Eisteddfod yn y Bae flwyddyn nesa' yn un "niwtral" o ran lleoliad a'r cynllun oedd i gynnal 'steddfod yno bob pedair blynedd - 'roedd y ddwytha yn 2005. Ond gan bod yr Eisteddfod genedlaethol yn ymweld a Chaerdydd 'lenni a'r Urdd wedi bod yno yn 2002 hefyd, mae'r brifddinas yn gyndyn iawn o ariannu'r Eisteddfod. Tybed ai Aelwyd yr Ynys fydd y criw ola' i groesawu Eisteddfod yr Urdd i brifddinas Cymru?

Cliciwch ar y ddolen yma i wylio fideo o'r cyflwyniad - mae'n werth 'i weld!

Am dabl o holl ganlyniadau'r Aelwyd yn Eisteddfod yr Urdd eleni a thros y 5 mlynedd dwytha, ewch i aelwydyrynys.com/llwyddiannau.php.

Eisteddfod yr Urdd 08: Cystadleuaeth y Prif Gyfansoddwr

2008-05-26T14:26:00.005+01:00

Llongyfarchiadau enfawr i Ieuan Wyn am ennill yr ail wobr yng nghystadleuaeth y prif gyfansoddwr. Enillodd Ieuan y drydedd wobr y llynedd...pob hwyl iddo flwyddyn nesa' ;o) Dyma'r wobr gyntaf i'w hennill gan aelod o'r Aelwyd ar lwyfan yr eisteddofd eleni. Gobeithio'n fawr nad hi fydd yr ola'! Pob hwyl i weddill yr aelodau weddill yr wythnos, mae hi'n mynd i fod yn wythnos fawr!

Am dabl o holl ganlyniadau'r Aelwyd yn Eisteddfod yr Urdd eleni a thros y 5 mlynedd dwytha, ewch i aelwydyrynys.com/llwyddiannau.php

Gwefan newydd

2008-05-11T02:03:00.002+01:00

Mae'r aelwyd yn berchen ar wefan newydd...sydd wedi marw. Dwi'n gobeithio na marw dros dro mae o...! Unwaith y llwydda i i roi'r kiss'o'laiff iddi, mi fydd y blog yn troi'n archif ar gyfer y straeon fydd yn cael eu postio ar y wefan. Neu mi fydd y wefan yn troi'n preview i'r blog. Fel y mynnwch chi. Tan toc..

Eisteddfod Sir, oedran cynradd, Dydd Sadwrn 24ain Mawrth 2007

2007-03-25T16:27:00.000+01:00

Bu llawer o aelodau'r aelwyd yn brysur iawn drwy'r dydd yn darparu lluniaeth i fynychwyr yr eisteddfod yn yr Ysgol Gyfun, Llangefni. Diolch yn fawr iawn i'r criw i gyd fu wrthi yn coginio cacennau ac yn barod eu cymorth ar y dydd, yn enwedig i Derwena ac i Mr Urdd! Gobeithio bydd yr arian godwyd yn mynd tuag at dalu costau cludo a chlwydo'r aelodau yn yr Eisteddfod yn Sir Gâr.

Cyngerdd Melin-y-Coed, Nos Wener 23ain Mawrth 2007

2007-03-24T16:26:00.000+01:00

Cynhaliwyd cyngerdd gan yr Aelwyd i drigolion Melin-y-Coed (ger Llanrwst) ar nos Wener braf o Fawrth. Cafwyd noson hwyliog, braf, gyda llu o eitemau gwahanol i ddiddanu'r dyrfa, o gerdd dant gan Kim i fonolog gan Manon a llawer i eitem gan y côr. Mawr yw diolch yr Aelwyd am y wledd gawsom ar ôl y cyngerdd yng nghapel Bethel gan ferched y pentref ac am noson fendigedig mewn rhan hyfryd o'r wlad.

Eisteddfod Sir Ynys Môn, 17-20 Mawrth 2007

2007-03-21T16:25:00.000+01:00

Roedd yr aelwyd yn cystadlu mewn llu o gystadlaethau yn yr eisteddfod sir, yn unigolion, partïon a chorau. Llongyfarchiadau mawr i bawb fu'n cymryd rhan a phob hwyl dros y ddeufis nesa' yn paratoi at y genedlaethol lawr yng Nghaerfyrddin ym Mai!

Penblwydd Hapus Derek!

2006-11-17T14:29:00.000+01:00

Pen-blwydd hapus iawn i Derek, ein arweinydd! (Ta llywydd? Ein tad ni oll beth bynnag!) Yncl Derek yn 50 21 heddiw...pob hwyl i chi syr!

Cyngerdd Blynyddol, heno (07.09.06)

2006-09-07T10:31:00.000+01:00

"As seen" ar Wedi 7 neithiwr...

Dewch draw i Ysgol Gyfun Llangefni am noson braf yng nghwmni yr Aelwyd o Fôn. Yn ymuno â dros 65 o ddoniau ifanc o'r ynys y mae Aeron Gwyn, Caergeiliog, enillydd y Rhuban Glas yn yr Eisteddfod Genedlaethol yn 2005.

Bydd y cyngerdd yn dechrau am hanner awr wedi saith, a thocynnau yn £5 i oedolion a £2 i bobl ifanc (dan 16) ar gael ar y drws.

Be' gewch chi well na noson o ganu, dawnsio, sioeau cerdd a llawer o hwyl ar noson braf o Fedi?!

Y Gorau'n y Genedlaethol!

2006-08-24T23:24:00.000+01:00

Hynt a helynt Eisteddfod Genedlaethol Abertawe oedd prif weithgarwch Aelwyd yr Ynys dros yr wythnosau diwethaf! Nid oedd llawer o amser i baratoi ar gyfer yr Eisteddfod ac felly bu pawb yn brysur fel lladd nadroedd am dair wythnos yn dysgu'r darnau newydd! Penderfynwyd ganolbwyntio ar ddwy gystadleuaeth yn unig eleni gan fod yr Eisteddfod mor bell a gwnaed yn siwr fod y ddwy gystadleuaeth yn digwydd yr un diwrnod i leihau'r byrdwn! Ar ol llwyddiant ysgubol yr Aelwyd yn Eisteddfod Genedlaethol Eryri 2005 drwy ennill y brif gystadleuaeth i gantorion gwerin sef y Cor Gwerin hyd at 40 o leisiau, roedd pawb yn fodlon rhoi o'u gorau i geisio ennill y gwpan am yr ail flwyddyn yn olynol. I gyd-fynd a hyn, penderfynodd aelodau hynaf yr Aelwyd gystadlu ar gystadleuaeth y partion gwerin hyd at 20 o leisiau a hynny'n golygu fod criw llai yn gallu canolbwyntio ar y gystadleuaeth honno! Er bod un neu ddau o aelodau'r Aelwyd yn galifantio tua Gwlad Pwyl gyda Dawnswyr Mon yn y cyfnod cyn yr Eisteddfod, llwyddwyd i gynnal ymarferion llwyddiannus gan obeithio y byddai Catrin a Sion Gwilym yn dysgu'r caneuon tra ar eu gwyliau!! Roedd pawb hefyd yn gobeithio na fyddai'r hen Sion yn dychwelyd nol i Gymru fach eleni gyda choeden gyfan yn glynu'n ei ben-ol!!! Diolch i'r drefn, ni chafwyd yr un miri a'r llynedd a phawb mewn un darn i gychwyn am Abertawe ganol dydd, ddydd Iau y 7fed o Awst! Cynhaliwyd ymarfer sydyn yn y gwesty ym Mhenybont nos Iau cyn i bawb fynd am bryd o fwyd i ymlacio cyn y diwrnod mawr!

Bore cynnar oedd hi ddydd Gwener a'r bws yn gadael am yr Eisteddfod am 8.30! Cystadleuaeth y parti gwerin oedd gyntaf a honno syth ar y llwyfan! Yn anffodus, ni chafodd y parti lawer o lwyddiant am ein bod wedi canu'n "rhy iach" felly afiach amdani flwyddyn nesa! Roedd pawb felly yn benderfynol o roi sioe dda ymlaen ar gyfer yr un fawr gyda'r nos! Wedi llwyddo i blesio yn y rhagbrawf, roedd oriau o ddisgwyl cyn ymddangos ar lwyfan y Brifwyl! Manteisiodd nifer ar y cyfleusterau arlwyo gan gynnwys y bar i basio'r amser tra yr aeth eraill i'r Pafiliwn i gadw'n gynnes a chymryd gofal o'r lleisiau!!! Ymhen hir a hwyr, daeth yr awr fawr ac er ei bod hi'n tynnu am 10 o'r gloch, bu'r perfformiad yn un a blesiodd yr holl aelodau ac wrth gwrs, Nia! Ond, yn bwysicaf oll, plesiwyd y beirniaid yn fawr ac ni ddaeth yr un gair drwg o'r feirniadaeth ar y llwyfan nac ychwaith unrhyw son am ganu'n "iach"! Do, llwyddodd yr Aelwyd i gipio'r wobr gyntaf am yr ail flwyddyn yn olynol! Am y tripl fydd hi flwyddyn nesa' yn Sir y Fflint!

Mentrodd y rhan fwyaf o'r criw i Maes B i ddathlu'r fuddugoliaeth ac i fwynhau elfen gymdeithasol yr Eisteddfod! Bu dawnsio, canu ac yfed digon tan yr oriau man nes i'r bws gychwyn nol am y gwesty a phawb yn dyheu am wely i orffwys ar ol diwrnod hir a maith! A hithau'n fore Sadwrn, cychwyn nol am Ynys Mon fu hanes yr Aelwyd a phawb wedi blino'n lan ac ambell un yn dioddef o effeithiau Maes B!!

Fodd bynnag, prin yw'r gorffwys i holl aelodau'r Aelwyd! Bu criw y parti bechgyn yn brysur iawn ar ol yr Eisteddfod yn ymarfer ar gyfer 'debut' yr Aelwyd ar raglen JK a Joel ar BBC Radio 1! Fel rhan o daith haf yr orsaf radio oedd yn digwydd bod yng Nghaergybi y penwythnos diwethaf, cafodd bechgyn yr Aelwyd wahoddiad i berfformio rai caneuon Cymraeg a Saesneg ar y rhaglen! Cafodd 'Cerddwn Ymlaen' ei hatgyfodi a bu Owain Llwyd yn brysur yn creu trefniannau unigryw o gan The Automatic 'Monster' a'r clasur 'Horny, horny, horny'! Recordiwyd jingl newydd sbon hefyd yn arbennig ar gyfer rhaglen Chris Moyles! Cofiwch wrando ar Radio 1 yn achlysurol rhag ofn i chi glywed hogia'r Aelwyd yn ei morio hi!

Cynhaliwyd cyngerdd arbennig o lwyddiannus yn Eglwys Llanwenllwyfo nos Sul diwethaf ac mae popeth yn dechrau dod i siap ar gyfer Cyngerdd Blynyddol yr Aelwyd sy'n cael ei gynnal yn Ysgol Gyfun Llangefni, nos Iau, Medi'r 7fed. Bydd yr Aelwyd yn perfformio nifer o eitemau corawl, cyfraniadau gan unigolion, eitemau doniol ac ysgafn yn ogystal a dawnsio! Yn ymuno a'r cor, bydd un o aelodau amlycaf yr Aelwyd, sef Aeron Gwyn, enillydd y Rhuban Glas yn yr Eisteddfod Genedlaethol y llynedd! Mae tocynnau bellach ar werth gan aelodau'r aelwyd, Cwpwrdd Cornel, Llangefni a Swyddfa'r Urdd, Bangor - prisiau yn £5 i oedolion a £2 i blant.

Llongyfarchiadau mawr i holl aelodau'r Aelwyd sydd wedi llwyddo yn yr arholiadau!! Pob lwc i bawb fydd yn cychwyn mewn Prifysgolion a cholegau ym mis Medi!

Helfa Drysor

2006-07-11T21:46:00.000+01:00

Dewch yn llu i helfa'r Aelwyd ar nos Lun nesa', 17eg o Orffennaf. Bydd yr helfa (mewn ceir) yn cychwyn o Neuadd Penmynydd (ar y lôn rhwng Porthaethwy a Llangefni - ar y chwith wrth fynd o Borthaethwy); dewch draw unrhyw bryd rhwng 6 a 7 y.h. Bydd y daith yn costio £5 y car gydag unrhyw elw'n mynd at yr aelwyd. Bydd cyfle i archebu bwyd ar ddechrau'r daith (na fydd yn gynwysiedig yn pris y car). Gobeithio na fydd hi'n rhy anodd na rhy hir - cawn weld ar ôl i mi 'sgwennu'r cwestiynnau...!! Edrychwn ymlaen i'ch gweld yno!

Tudalen Luniau newydd

2006-07-01T00:30:00.000+01:00

Wedi laru efo'r "arbrawf" o ddefnyddio blogger i osod lluniau (peidiwch a thrio, dio'm werth o!), dyma droi at flickr. Yr unig anfantais yw nad oes modd Cymreigio flickr (am wn i), ond gan ein bod yn bwriadu symud at wefan "iawn" (hmm) yn y dyfodol, gobeithio mai rhywbeth semi-dros-dro fydd hwn hefyd! Gobeithio cawn fwy o luniau i'w hychwanegu'n fuan; gyrrwch unrhyw luniau sydd ganddoch i aelwydyrynys[at]yahoo.co.uk.

Dyna ni am y tro, cewch adroddiad am y barbiciw yn fuan gobeithio!

Cryno ddisg... Cibab... Cyngerdd!

2006-06-28T00:11:00.000+01:00

Nos Fawrth (27/06/06). Lleoliad - Capel Lon y Felin, Llangefni

Noson ymarfer tra gwahanol gafwyd heno (nos Fawrth)! Daeth Sion o Stiwdio Sain atom i recordio cor yr aelwyd yn canu ar gyfer cryno ddisg newydd fydd yn coffau bywyd Gwynfor Evans. Derbyniodd Owain Llwyd y dasg o gyfansoddi alawon gwreiddiol i fod yn gefndir i'r barddoniaeth sy'n cael ei adrodd ar y CD newydd ac Aelwyd yr Ynys gafodd y fraint i recordio'r darnau corawl. Yn sicr, dyma brofiad newydd i nifer o aelodau'r cor ac yn gyfle unigryw i'r aelwyd fod yn rhan o brosiect newydd a chyffrous. Wedi dwy awr prysur o ganu, 'wwwio' ac 'aaaio', draw i'r 'Bull' aeth y criw am beint bach distaw i leddfu'r 'vocal chords' ac i drefnu barbeciw mawreddog! Mwy am hynny ar ol nos Wener...

Dyma restr sydyn o'r prif ddigwyddiadau y bydd yr aelwyd yn ymgymryd a hwy yn ystod y misoedd nesaf:

30ain Mehefin: Barbeciw - Ty Cibab
8fed Gorffennaf: Noson Lawen - Tyddyn Mon, Brynrefail
12fed Gorffennaf: Noson Lawen (S4C) - Cae Sioe, Mona
14eg Gorffennaf: Cyngerdd Blynyddol Band Deiniolen - Ysgol Brynrefail, Llanrug
17eg Gorffennaf: Helfa Drysor (ceir) - Sion Gwilym yn trefnu!
5 - 12 Awst: Eisteddfod Genedlaethol Abertawe

Rhagorol yn Rhuthun!

2006-06-27T00:29:00.000+01:00

Gwawriodd wythnos Eisteddfod yr Urdd Sir Ddinbych 2006 a'r aelwyd yn ymfalchio'n y ffaith ei bod yn cael ei chynrychioli mewn bron i ddeg ar hugain o gystadlaethau! Ar ol dad-flino a dychwelyd i normalrwydd, dyma adroddiad byr o fwrlwm y cystadlu i griw Aelwyd yr Ynys.

Daeth y llwyddiant cyntaf yng nghystadleuaeth yr unawd Cerdd Dant rhwng 15 a 19 oed gyda Catrin Roberts (Toffoc) yn cipio'r wobr gyntaf. Buddugoliaeth arall ddaeth i Catrin yn ddiweddarach ddydd Gwener wrth iddi hithau a'i chyfneither Manon Dafydd ddod i'r brig yng nghystadleuaeth y ddeuawd dan 19 oed. Llwyddodd y tim siarad cyhoeddus i gipio'r ail wobr ar faes yr Eisteddfod nos Wener gan gwblhau dechreuad gwirioneddol wych i'r aelwyd o Fon.

Wedi ymarferion munud olaf nos Wener, Ysgol Gyfun Llangefni oedd y man cyfarfod am 6 fore Sadwrn er mwyn hwylio draw i Rhuthun ar gyfer y rhagbrawf cyntaf am 7.30! Marathon o ddiwrnod gafwyd ac mae'r rhestr isod o lwyddiannau'r aelwyd yn profi hynny:

Unawd Cerdd Dant 19 - 25 oed - Huw Foulkes - 2il
Ensemble Lleisiol 14 - 25 oed - Bethan, Catrin, Ifan a Huw Stretch - 2il
Chwarter Awr o Adloniant - Aelwyd yr Ynys - 2il
Cor S.A.T.B. 14 - 25 oed - Aelwyd yr Ynys - 2il
Detholiad o Ddrama Gerdd Gymreig - Aelwyd yr Ynys - 3ydd
Cor S.A.T.B. 14 - 25 oed (Aelwydydd Traddodiadol) - Aelwyd yr Ynys - 3ydd
Dawns Werin 14 - 25 oed - Aelwyd yr Ynys - 3ydd
Parti Cerdd Dant dan 19 oed - Aelwyd yr Ynys - 4ydd

Yn sicr, llwyddodd yr aelwyd i gyfareddu a swyno nifer o eisteddfodwyr pybyr yn ystod yr wythnos ac mae'r ffaith iddi lwyddo mewn cynifer o gystadleuthau amrywiol yn dangos ymrwymiad ei haelodau a'u gwaith caled yn ystod y misoedd diwethaf! Llongyfarchiadau enfawr i bawb fu'n cymryd rhan, boed hynny'n lwyddiannus neu beidio. Heb os, pe byddai tarian i'r aelwyd uchaf ei marciau yn yr Eisteddfod, byddai Aelwyd yr Ynys ben ac ysgwydd uwchben yr aelwydydd eraill ac mae hynny'n glod i griw'r ynys!

Daeth llwyddiant pellach i ddwy o aelodau'r aelwyd a ddeilliodd o'u perfformiadau yn ystod yr wythnos! Bu Catrin yn ddigon ffodus i ennill Ysgoloriaeth yr Eisteddfod am y perfformiad gorau dan 19 oed. Nid dyma'r tro cyntaf i un o aelodau'r aelwyd ennill yr ysgoloriaeth arbennig hon. Cipiodd Aeron Gwyn (enillydd y Rhuban Glas llynedd) y wobr nol ar gychwyn y 90'au. Tybed a fydd Catrin yn dilyn ol troed Aeron ac yn cipio'r Rhuban Glas rhyw ddydd?

Llongyfarchiada' hefyd i Manon Wyn am gipio ysgoloriaeth y BBC am ei pherfformiad hynod wefreiddiol yng nghystadleuaeth y chwarter awr o adloniant. Bydd Manon yn cael y cyfle i gyflwyno ar Radio Cymru yn y dyfodol agos - mae Jonsi yn crynu yn ei sgidia'yn barod! Mae Manon eisoes wedi dangos ei dawn anhygoel wrth actio gan iddi ddod yn ail yng nghystadleuaeth Gwobr Goffa Richard Burton yn yr Eisteddfod Genedlaethol llynedd.

Ar ol bwrlwm y cystadlu, heidiodd criw'r aelwyd i goleg Llysfasi i ymbincio a newid yn barod am noson o ddathlu ar strydoedd Rhuthun! Wedi gwneud yn siwr fod pob blewyn o wallt yn ei le, draw am y Clwb Rygbi aeth y criw gan ddarganfod eu hunain yn canu a dawnsio i fandiau Labrinth a Frizbee! Wrth gerdded nol o'r Clwb Rygbi fe lwyddodd ein cyfeilydd, Owain Llwyd, i neidio oddi ar wal gan ddisgyn yn ddisymwth ar ei ffer wrth daro'r llawr! Bu mewn poen aruthrol ac nid da o beth yw cael troed wan wrth gerdded ar hyd strydoedd Rhuthun i chwilio am dacsi a rheini'n betha prin, yn enwedig yn Rhuthun! Bu'n griddfan mewn poen a Doctor Bethan yn gwneud dim i'w helpu ond chwerthin yn afreolus ar ei anffawd! Ar ol gwydraid neu ddau, bu pawb yn ddigon ffol i aros yn effro tan oriau man y bore yn ei morio hi yn un o ystafelloedd y coleg. Yn dilyn traddodiad Eisteddfod Caerdydd 2005, bu Peredur Glyn yn cyfansoddi limriga' yn seiliedig ar alaw Nant y Mynydd a phawb yn ymuno yn y gytgan! Ond buan daeth y noson i ben a phawb wedi blino'n lan ar ol diwrnod caled o ganu, dawnsio a disgyn! Am un ar ddeg fore Sul, cychwynodd y bws yn ol am Ynys Mon a ninnau'n ffarwelio a Sir Ddinbych.

Does ond gobeithio y cawn lwyddiant tebyg a digon o hwyl yn Abertawe fis Awst...

Medalau fri!

2006-06-03T20:12:00.000+01:00

Daw medalau fri yn ôl i Ynys Môn wedi Eisteddfod hynod lwyddiannus i'r Aelwyd yn Sir Ddinbych. Wedi misoedd o baratoi a gwaith caled daw'r aelodau'n ôl i'r fam Ynys gyda gwên fawr ar eu wynebau a 10 medal i'r Aelwyd, sef 2 Aur, 5 Arian a 3 Medal Efydd. Mawr obeithir bod pawb wedi mwynhau eu hunain a diolch yn fawr iawn i bawb am eu hymroddiad dros y misoedd diwethaf. Gobeithir cael lluniau ac erthygl fanylach o'r hanes yn fuan.

Llwyddiannau!

2006-06-02T23:40:00.000+01:00

Cafodd yr Aelwyd eu medalau cyntaf yn Eisteddfod Genedlaethol yr Urdd, Sir Ddinbych 2006 heddiw wrth i Catrin "Toffoc" Roberts o Lanbedrgoch ddod i'r brig yn canu Cerdd Dant. Yn ogystal, daeth hi â'i chyfneither Manon Dafydd o Roscefnhir yn gyntaf wrth ganu Deuawd. Dyma ddechrau gwych i obeithion yr Aelwyd yn yr Eisteddfod!

Byddwn yn brysur iawn yfory, yn cystadlu ar nifer fawr o gystadleuthau gan gynnwys mynd "am y tripl" gyda'r detholiad o Sioe Gerdd, wedi ennill y gystadleuaeth honno ddwy flynedd yn olynol bellach. Gobeithio bydd pawb ar eu gorau ac wedi cael digonedd o gwsg cyn cychwyn o Sir Fôn am 6 bore fory!

Lluniau yma

Steddfod!

2006-05-31T00:50:00.000+01:00

Gair bach i ddymuno pob lwc i bawb o aelodau'r aelwyd fydd yn cymryd rhan yn yr Eisteddfod ddydd Gwener a dydd Sadwrn! Rhowch hel iddyn nhw!!!!

Is-etholiad

2006-05-11T19:12:00.000+01:00

Yn dilyn ymddiswyddiad yr is-gadeirydd, cynhelir etholiad i ethol un newydd wythnos nesaf. Y tri ymgeisydd yw:

Ifan (Cibab)
Peredur (Glyn)
Rhys (Sbarion)

Pob hwyl i'r tri!

Mawl a Chân, Moelfre

2006-04-24T15:30:00.000+01:00

Canodd yr Aelwyd mewn noson Mawl a Chân yng Nghapel Carmel, Moelfre neithiwr. Trefnwyd y cyngerdd er budd Pwrs y Samariad drwy Mrs Mair Parry. Bydd ar arian a godwyd yn mynd tuag at brynu puryddion dŵr ar gyfer Liberia yn Affrica.

Diolch yn fawr i Sioned Owen a Peredur Glyn am drefnu'r rhaglen, a hefyd llongyfarch Peredur ar arwain y côr am y tro cyntaf, gyda Nia yn cyfeilio! Roedd yn noson yn llwyddiant, a rhaid yw nodi unwaith eto bod y bwyd wedi plesio, yn enwedig y Brechdanau Ŵy gan Huw Sdrej!

Lluniau i ddod yn fuan.

Lluniau

2006-04-23T18:09:00.000+01:00

Diolch i Peredator am y syniad, mae gan yr Aelwyd bellach dudalen ar gyfer lluniau. Cliciwch ar y ddolen ar y chwith.

Merched y Wawr yn Rhosybol

2006-04-20T00:32:00.000+01:00

Perfformiodd yr Aelwyd i Ferched y Wawr Rhosybol a'r ardal leol heno, gyda 30 o aelodau brwdfrydig yn barod i fynd ar goll ym mhellafoedd Sir Fôn (dim byd yn erbyn Rhosybol - mi gollson ni ddau gar yn mynd mewn confoi o Seffwê C'narfon i stiwdio Sain un tro!) .

Cafwyd derbyniad da, yn arbennig felly i Huw Sdrej ag Ifan Cibab ar eu deuawd doniol! Yr oedd y bwyd yn dderbyniol iawn yno ac yn ôl llygad-dyst bu i Rhys Lloyd "joio'r selsig, caws a nionod picl ar bren". Da oedd felly. Cofiwn y noson am i Arwyn gael ei ail-enwi ddwywaith - noder, ferched Rhosybol, mai Arwyn yw ei enw a nid Irfon nag Arfon!

Cyfarchion!

2006-04-19T01:16:00.000+01:00

Llongyfarchiadau i un o aelodau'r aelwyd, Ceri Bright, sydd wedi dyweddio yn ddiweddar â Jac Foulkes! Dymuniadau gorau i chi'ch dau!

Croeso!

2006-04-19T00:13:00.000+01:00

Croeso i wefan Aelwyd yr Ynys! Bydd hon yn gornel fach i ni ar y wê i gael rhannu ein hanesion a'n newyddion gyda chwi. Tamaid i aros pryd - hanes un Tegwared ap Seion yn chwarae castiau â'r Aelwyd! ;-)